اسطوانات الشباب والبنات

]شوفو بقى يا جماعة الاسطوانات دى كترت قوى جدا يعنى عند الولاد والبنات أحنا هنشوف شرح مبسط ليها على سي دى الكروان
اولا الولاد
الواد من دول بقى اول لما يعجب ببنوتة يفضل بقى يتنطط ويعمل المستحيل علشان يخليها تحبه والمسكينة طبعا تقع فى حبه وتوافق على الارتباط ويفضل بقى يقول فى اشعار وكلام جميل وبحبك وبموت فيكى وانتى ماما وانتى بابا وانتى انور وجدى ومش هكمل بقى الجزء الحلو من الاسطوانات دى لان انتو كلكو عارفينه
الجزء الوحش بقى يقلب بسرعة اول لما نيجى للجد والبنت ياعينى تقوله تعالى بقى اتقد ولا كلم بابا وتلاقى فجأة كلام غريب كلام مش معقول وماقدرش اقول حاجة عنه
الظروف بقى والجوابات والجيش على أساس يعنى ان الواد مش عارف ان عنده جيش من الاول وممكن يكون وحيد اصلا وممكن يكون بابا جايبله عروسة بقى بنت واحد صاحبه بنت الجيران بنت المكوجى اصل بابا المكوجى ليه عند بابا فلوس ولو مش اتجوزها هيسجنه ياحرام او ان المسكين مايقدرش يتجوز غير لما يتطمن على اخواته ويجوزهم ويجوز الجيران وولاد الجيران بيشقى الراجل والله الله يكون فى عونه وطبعا لازم يعمل كده امال ايه ما النبى وصى على سابع جار
وحاجات كتيرة كده من هذا القبيل
أما بقى البناتيت الامامير فهما غلابة شوية
مش تحيز والله لاء بس لان البنات ماعندهمش جيش وده طبعا بيفرق كتير فى بيع السى دى امال ايه
البنت طبعا تفضل تقوله انت اللى فى اليمين وانت اللى فى الشمال وانها مش هتقدر تسيبه ابدا وانها المخلصة هتسعده طول ماهى معاه وعمرها ما هتشوف غيره وتلاقيها بتبص لنص شباب البلد من وراه
ويبدأ الجزء التانى اول ما ظروف الغلبان تصعب شوية يجى يشتكى ويفضفض بقى
تزهق هى بقى وتسمع له وهى من جواها بتقول يارب نخلص لخص بقى انجز يحرقك انت ومشاكلك وجالها عريس بقى حليوه كده وفرفور وعنده قرشين حلوين
وهى طبعا هتكون زهقت وقرفت وملت من صاحبنا المسكين اللى ظروفه دايما وحشة مع انه ممكن يكون اول ظرف وحش عدى عليه تقوم هى فى يوم تبعتبله دعوة فرح وهو يغنى ظلموه وعيد ميلاد جرحه هو وكده يعنى
ومازالت الاسطوانات مستمررررررررة
تبدأ عند الولاد بانه بيحبهاوعمره ما هيزعلها وعند البنت بانها خايفة من الارتباط وعواقبه
وتنتهى عند الولاد بأنه ياحرام خايف يظلمها معاه وانها بنت ناس وعند البنت بأنها المسكينة مش قادرة تستحمل الظروف والجوابات وغيرها يعنى
ياريت بقى يا جماعة نحاول نغير السى ديهات دى